我同意佬一齊住埋咁耐，結咗婚後其中一樣嘢唔同咗就係一人多咗一隻戒指。兩個每日出街前戴起戒指時特別興奮，成日會互相交換檢查，睇吓邊個戴得花啲，又周不時攞塊石布卒卒佢，睇嚟我哋真係好珍愛呢對戒指......我諗除非迫婚，否則新婚夫婦應該都好雀躍話俾人知「已經有人了！」
可惜我哋戴咗唔夠一個月就要暫時除低佢 ～嗚嗚，事關阿根廷呢期實在太亂，阿根廷披索日日貶值匯率跌到吧吧聲，日日有大型示威，平均每兩個街口見到一家乞兒瞓街，係一家人唔係一個！可憐得小市民買件衫大約港幣500蚊都要分期付款。
咁混亂嘅治安，成日見新聞啲人揸架電單車當街當巷搶阿婆手袋，真係冇陰公！
唔想喺呢度戴咁多豬耳繩出街惹人犯罪，我哋珍而重之嘅婚戒，唯有暫時同佢哋講拜拜。
食得鹹魚抵得喝，要周圍漂泊，有時都冇得揀要生活簡樸。
有人認為結婚後務必要戴婚戒，會係一種束縛。亦有人認為婚戒係婚姻嘅一部分，不可或缺。唔知大家對婚後必須要戴婚戒有何睇法呢？
意佬何曾擔心地問我：「如果你唔戴戒指，咁你返學有同學仔聊你傾計咁點算？」
「傻佬，我第一堂自我介紹已向外公布我係人妻啦」
都話愛一個人唔洗吓吓掛個愛字喺口唇邊，意佬傻更更地一問，我心甜足一星期！
對結婚戒指已好好收藏喺我同意佬嘅小寶盒入面喇，希望可快啲有得返去意大利將呢個金環戴返落無名指啦。
#交換結婚戒指以後
#食得鹹魚抵得喝
#要周圍漂泊
#有時都冇得揀要生活簡樸
Search